الدمعه اللي ماتهز صدور ربعي لاتسيل

لولا البكا ماينشـرح خاطـر ولاينـزاح ويـل
خل الكدر يطفي سعير الليلتيـن اللـي خلـت
دام العيون الليا اهملت تشفي القليل من الغليل
الله يبارك بالعيون اللي ليـا ضقـت اهملـت
دمعة قهر تثبت لي ان اللـي يحبونـي قليـل
ولاضحكه بوجيه ناس لـي تضايقـت انكلـت
البارحه يوم الهموم تحـط بالصـدر وتشيـل
والشاهد الله ماحبست بمحجري دمـع وفلـت
الدمعه اللي ماتهـز صـدور ربعـي لاتسيـل
اكنهـا مثـل الجمـر ولايقولـون انـزلـت
اللي وهـو مافزلـي كنـه محملنـي جميـل
اجيه برجولي عشان اشكي له الحال ؟ اكملـت
ماكل من شافك قوي يفرح ليـا جيتـه ذليـل
الناس لي من حست بضعف الشجاع استذلـت
بعيونهم ببقى مثـل ماللهبـوب مـن النخيـل
على كثر ماضامها صفـق اللواهيـب اعتلـت
وشلون احس ان العذاب اللي على متني ثقيـل
وانا ادري ان اللي تصبرني على الحزن وصلت
معشوقتي لاضاق صدري من ليالي الحزن ليل
ياكثر ماشربت معي من علقم الحـزن وكلـت
معشوقتي ما للفرح برجوعهـا يمـي سبيـل
الا مثل ما للربيع مـن الزهـور ليـا ذبلـت
معشوقتي من عمر جيل ومدرسة مليون جيـل
معشوقتي ورث السنين اللي تجلـت وانجلـت
اللي على كثر المصايب كـل مافيهـا جميـل
الناس لي كبرت تشين وذيك لي كبرت حلـت
لامن تثنـت للهبـوب تميـل اللـي مايميـل
وان مالت عقول الخفاف من الرياجيل اثقلـت
كن الكلام بثغرها مجـرى سبيـل للسلسبيـل
مسترسله لو ماضميت ولو ضميت استرسلـت
تقبل على لون المسا لاجـات مفتولـه جديـل
غصبن عن عيون النسا مايرمشن اليا قبلـت
عشقتها لاني من اللـي يعشقـون المستحيـل
صدقتها لانهـا لـي قالـت القـول : افعلـت
الترفه اللي تنطـح الفريـس وتفـك الدخيـل
ما الرجال اللي تحملني مثـل مـا استحملـت
لـو كـل خلـق الله ملـو ماتمـل وماتميـل
لان الرجال بهالزمن قلـو هذيـك استرجلـت
ان كان وقفتهم معي من باب مايخدم بخيـل!!
هذيك ماهيب وقفت جنبي .. هذيـك تبهذلـت
خانوا وهي ماهونـت عالـو وعيـت لاتعيـل
تبدلـت كـل الـوجـوه وذيــك ماتبـدلـت
لانه ليا عز الرجـا مـا للخليـل الا الخليـل
ماكد قرت في محجري قصة عن الحزن وسلت
كل الذي يجري معي يجري مع الطرف الكحيل
اليا رضيت ترضى عشاني وان تزعلت زعلـت
تدوي بخفاقي دوي لين احيت الحلـم القتيـل
عشق بدويه لبدوي لاجت على البـذل ابذلـت
معها عرفت اني قوي حتى وانا مافـي حيـل
واعدها بمية خوي كـان الهمـوم استفحلـت
دام الشدايد تكشف بصاحبك معدنـه الاصيـل
ليت السنين اللي حدتني على الضياع استعجلت
الشدخ اللي تثبـت ان اللـي يحبونـي قليـل
ولا ضحكه بوجيه ناس لي تضايقت وانكلـت
بنت ليا منك وقعت تشيلك مـن القـاع شيـل
ابرك من وجيه الرجال اللي ليا طحت جفلـت